由藝人之家主辦嘅音樂會，一連兩晚喺西九舉行，有份籌辦嘅王祖藍同太太李亞男，聯同多位歌手藝人參與，好似關心妍、王菀之、衛蘭、衛詩、孫耀威、吳文忻、車婉婉、黃劍文、陳芷盈、龔柯允等等，就連遠在美國，年屆96歲嘅喬宏遺孀小金子、黃愷欣、仲有杜麗莎等都有專誠來港出席音樂會。
呢晚同婉婉、芷盈、龔柯允一齊合唱嘅劍文，已經加入咗藝人之家9年，可以同一班弟兄姊妹一齊以歌聲送暖，佢都覺得特別開心呀。
講到全晚最感動嘅一環，就係小金子、陳敏兒以及黃愷欣，齊齊隔空向已返天家嘅另一半深情對話，場面令人動容。年屆96歲嘅小金子，坐住輪輢出場，佢話：「喬宏，26年沒能見到你了，我知道你在天上很好，聖誕對我跟你來說，還有更深一層意義，因為我跟你，咱們是在1957年的聖誕夜訂婚，68年啦，你知道嗎？我今年96歲了」然後全場佈以掌聲。
而陳敏兒亦分享，智叔喺人生最後一個聖誕節，雖然身體非常不適，但仍然堅持一家人出席聖誕聚會，又用二胡演挨《平安夜》，佢答應智叔會好好生活落去。
呢排忙住還歌債嘅Ivana，經常默默喺屋企寫歌，難得現身舞台演唱一曲《我真的受傷了》，Ivana接受我哋主播 許文軒 訪問時，仲話Edmond喺佢心目中係最佳主持，令Edmond當堂信心大增呀。Ivana表示好耐無接受訪問，面對鏡頭都變得怕醜咗，佢話自己雖然有段時間無出嚟見大家，但其實一直喺屋企忙住寫歌還歌債呀。
