11月底嘅大型籌款節目《善心滿東華》因為節目內容調整關係，一眾藝人嘅精彩籌款項目將於今個星期六27號晚於節目《東華三院善道同行》中同觀眾見面，當中 袁偉豪Benjamin 同應屆港姐 陳詠詩Stacey 嘅合力演出驚險項目。
兩位先聯同一大班同事跳上行駛中嘅車上，做出叠羅漢動作，而兩人亦分別有個人表演項目，騎住越野電單車嘅阿Ben首先越過獨木橋，再連人帶車穿牆，最後仲嚟個特技飛車，傾力為項目籌款。
演出後阿Ben都感慨已經七年冇接觸類似項目，過程中有好多心理關口，始終自己已經成為兩孩之父，所以事前度橋時都有所顧慮，笑言當腎上線飆升時，就只諗到飛啦。在場見證住阿Ben飛車嘅一班同事都戥佢緊張同興奮，完成人生一大創舉，阿Ben都走埋向去感謝在場同事嘅鼓勵，並坦言未試過飛咁高同咁遠，個項目真係特技人嘅專業，演出時撞落紙皮箱到時更不慎衝撞到心口，幸好冇大礙。
Stacey就喺電單車上表演最拿手嘅體操，做出多個高難度動作，畫面優美，而最後一幕Stacey更加需要好大嘅膽色，因為要喺兩架車一邊行駛之間做出一字馬，極具難度挑戰，佢都話事前同演出時都超緊張。
