1月18號係胡楓94歳生日，連日嚟佢都同不同好友慶祝，呢日修哥現身好友王玉環嘅慶祝晚宴時，收穫大大祝福，仲好精靈咁同傳媒開玩笑，自稱係「47對」生日。
修哥日前獲周潤發、譚詠麟、劉德華等巨星齊齊唱生日歌賀壽，令見慣大場面嘅佢都嚇咗一跳，坦言自己咁大個仔都未試過咁大場面，非常意外：「當日兩位華仔(劉德華、黃日華)突然間落台秤起我上台唱生日歌，真係好意外。」發哥當日都有到場，講到有冇叫修哥一齊跑步時？修哥又搞笑話冇，佢叫我同周公一齊跑。
修哥新一年落實會再次開騷，佢喺行內契仔眾多，人人都好錫契爺，但修哥開騷就唔好意思打搞大家，唯獨會叫張家輝嚟參與。之前修哥去咗睇其中一位契仔張學友嘅演唱會，仲獲得學友獨家福利，叫修哥點唱三首歌曲。
王玉環呢晚由老公陪同舉行慶祝晚宴，賀佢喺保險業界有破紀錄成績，圈中一班好友羅霖、張文慈、文雪儀、謝寧、陳曼娜、郭秀云、杜德偉等都一齊嚟開party ，王玉環更分享由藝人轉投業界嘅成功之道，多年來獲得老公支持係最大鼓勵。
杜德偉帶同老婆一齊現身，Alex多年嚟唔單只自己keep得凍齡，就連夫妻相處之間都同樣保鮮。
