每逢農曆新年，TVB都會製作充滿節日氣氛節目，電視城呢日非常熱鬧，花團錦簇又有舞獅表演，充滿過年氣氛，電視廣播有限公司行政主席許濤先生，率領一眾行政人員，為新春特備節目《丙午年吉星高照年初一》錄影，重頭戲當然就係派利是。
Liza姐汪明荃 率領一眾司儀包括 區永權 、 馮盈盈 、 阮浩棕 、 許文軒 、 莊子璇 、 倪嘉雯 同 鄧凱文，仲有《中年好聲音3》嘅冠亞季軍唔 黃博 、張與辰 同 劉洋 ，大家着到紅噹噹周圍逗利是，重點目標一定係財神 修哥胡楓 。一向風趣嘅修哥望住主播 鍾翠詩 時話「開始做財神嘅時候，妳都未出世呀！」修哥話自己每年都向大家拜年同派利是。
有份參與嘅張與辰非常興奮，好期待新春時候見到自己嘅電視度出現向大家拜年。黃博話除咗可以向修哥逗利是，又可以同阿姐合唱，非常開心。劉洋話今年會係首次喺香港過年，已經感受到節日氣氛。
回顧過去一年，以及展望來年，幾位唱家班嘅願望當然離唔開唱歌，修哥讚與辰今年歌唱成績非常好，因為 陳松伶 個演唱會都由佢擔任音樂總監。黃博 同 劉洋 都期待再推出更多好歌畀大家聽，而劉洋仲想參演更多趣劇。
見大家同主席逗利是都畢恭畢敬，估唔到Albert竟然向主席提出一個好大膽嘅要求，就係大家一齊望住鏡再派多次利是。盈盈話最難忘就係向修哥逗利是，因為係最好意頭同福氣，如果放喺屋企一年就可以財源滾滾來。Edmond話當自己發現漏咗逗修哥利是時，即時追住修哥擺好意頭。阿Nic早前跟阿姐拍節目合作愉快，佢話今年最期待係去阿姐屋企拜年。
