香港演藝人協會初八喺會長古天樂、副會長錢嘉樂及一眾理事會成員率領下舉行2026年春茗茶聚，吸引逾百會員踴躍出席，包括羅蘭、余慕蓮、馮素波、丁羽、劉江、程可為、吳浣儀、梁葆貞、黃夏蕙、陳勉良及黃文標等現身支持，場面墟冚。
香港演藝人協會第十七屆理事會換屆大選已於去年底完成，古天樂連任會長，錢嘉樂、張繼聰任副會長，古天樂自上任香港演藝人協會會長後，一直與眾理事會成員致力維護演藝人權益，並積極進行各類慈善公益活動，當中包括School Tour、老人中心探訪等。
會長古天樂今年一如往年喺春茗茶聚向全場會員派發利是，亦向全場會員派發由福幼基金會贊助嘅福袋；而余安安、張繼聰、周家怡、張敬軒、岑樂怡亦有贊助現場禮品及抽獎禮物，令每位出席會員滿載而歸。
席間頒發「傑出演藝大獎」以表揚過去多年來為演藝界貢獻良多嘅前輩藝人，今年由吳浣儀、程可為、劉江榮膺獎項，三人喺古天樂及錢嘉樂手中接過獎項，期間吳浣儀、劉江不約而同表示自己係首次出席演藝人協會活動，劉江話：「好多謝大家冇忘記我，自己唔習慣參加呢啲場合，性格比較內向，今日第一次出席。平時喺TVB成日見到大家，感覺係理所當然，但原來唔喺TVB嘅話要見面係好難，今日見番大家好開心，多謝大會頒呢個獎，我覺得自己未有資格。」
吳浣儀亦感謝古天樂會長及一眾理事，大讚佢哋非常有心。 程可為領獎時，盡顯幽默風格：「我最唔識講嘢，竟然要我講嘢！好開心呢個年紀、呢個記性仲可以出鏡演繹角色，回顧一生到而家，我覺得而家係最開心，捱到而家75歲仲有工作，真係想唔到，有健康、有靚嘅心情。感激上天畀智慧我，同埋畀個樣我啦，而家都仲睇得吓啦！多謝大家！」
羅蘭姐呢日精神飽滿到場，席間不少藝人上前跟佢合照及拜年，問到羅蘭姐健康情況，羅蘭姐大方話：「腳麻麻地，天氣潮濕，腳會痛，新年都唔敢周圍去，驚多人。而家冇拍嘢，會喺屋企唸吓天主經、聖母經，朋友會打嚟傾吓偈，電視有節目教人做運動，我每日都會跟住節目做大半個鐘運動。」
