陳德森 導演聯同寫作人推出電影小說系列舉行發佈會，眾多圈中好友錢嘉樂、李龍基、鄭丹瑞、胡楓、葉子楣等都有現身支持。
席間陳德森導演更公布，會同香港動作特技演員公會合作監製一部新戲，為年邁演員籌款謀福祉，誠邀香港90年代創下動作電影輝煌史嘅演員出演，重震聲威。新片陣容強勁，會邀請同洽談中嘅包括李連杰、洪金寶、徐克、元彪、元華、元秋、董瑋、吳京等，甄子丹亦將稍後聯絡，以至《古惑仔》及《無間道》嘅倪氏家族等經典都會重現。
另一方面佢哋亦邀請張家輝、古天樂、佘詩曼等參與，聽卡士已經好震撼。陳德森坦言若果非為香港動作特技演員公會籌款，過百萬都難以請得到個別藝人參與，好開心大家為公益完全唔講錢。
錢嘉樂身為特技演員公會會長，好榮幸能為籌款出力，仲有份擔任導演，傾力廣邀前輩級嘅動作演員參與。佢透露眾多大哥同一線演員都一呼百應。而喺早前公會已經通過向政府申請資助，開戲前公會會舉辦一個動作特技訓練班，屆時學生可以喺年尾參與電影其中，具有傳承意義。
旦哥女兒鄭瑤喺元宵佳節誕下B女，呢日榮升公公嘅旦哥亦興奮分享抱心情，仲親自睇住護士幫BB沖涼兼拍片，最令旦哥感動係BB未見人已聞其哭喊聲，笑言肺活量高，似足佢哋家族。
基哥自從同前未婚妻王青霞 甩拖後，感情狀況空虛寂寞，日前更不慎病倒幾乎失聲，基哥笑言可能因冇人幫自己冚被。雖然已經習慣單身，但夜晚都會攬住枕頭入睡。至於有傳基哥同Chris或有機會復合，基哥話等上天安排，但都希望Chris可以搞清楚一切先再講其他。