《中年好聲音4》噚晚播出「導師分組賽」當中，由布志綸率領「紅隊」總分265分，張嘉銘率領「綠隊」總分259分，銀老師率領「紫隊」總分258分，綠隊以1分之差險贏紫隊，紫隊要淘汰王卓樂與謝昉益，銀老師與多位參賽者泣不成聲。
由於紫隊總分數成績最低，5位評判「退庭商議」後得出結果，謝昉益被淘汰時，不少戰友哭成淚人，鄭家聲淚流披面，謝昉益連講兩次「我冇事喎」安慰其他參賽者，更並搞Gag試圖緩和氣氛，稱試過被途人誤認係戰友鄭家聲，話佢唱《他不愛我》好好聽，鄭家聲聞言更激動爆喊，謝坊益感激《中聲4》，讓佢認識來自唔同地方嘅好友，自己亦會繼續睇住大家比賽。
卓樂被淘汰嗰陣坦言對自己失望，仍然未有一次滿意演出，佢話睇呢啲「魔王」表演，自己都唔失禮，佢好希望笑住離開呢個舞台，跟住淚水喺眼眶裡打轉，擠出笑容，令場面傷感。
選手范子睿喺社交平台分享與卓樂喺參賽期間相處嘅感覺，佢記得第一次聽卓樂唱《原諒我》，第一個觀感就係「個頭有啲反光同埋好串～又唔講嘢」，范子睿稱導師賽開始真正認識佢：「其實節目播出真的因為時間關係刪減了很多片段～卓樂走的時候的發言真的是鐵漢子的表現！搞爆曬現場所有人水煲～我依舊很記得當時婉婉姐講：『你為甚麼不轉身看看你的組員？』卓樂卻說：『唔得！我見到佢哋，我會搞唔掂！說罷就急急腳走落台痛哭。』」
范子睿稱卓樂外表睇落好似好惡咁，私底下好搞笑、好溫暖，仲好講義氣！范子睿記得比賽前10日，卓樂幾乎每日都去銀老師教室上課，「總是能聽到上一組的選手在上課，第一次在房外聽到他們唱的時候，我會在想，死啦，兩個聲音好似唔系好夾喔！但係隨著日子嘅推移，我慢慢開始分唔清佢哋兩個嘅聲音，音色越來越貼、和聲越來越準」。
范子睿相信卓樂喺短短10日除咗老師每次上課一、兩個鐘以外，課後亦付出好大嘅努力，范子睿坦言以前睇電視唔知點解參賽者要喊，當自己身在其中，「發覺好多嘢係自己控制唔到，當下好多嘅感受係無辦法複製。呢一整集，我們紫組的眼淚加埋估計可以游水了」。
