蕭正楠當年與太太黃翠如喺新西蘭註冊結婚，阿蕭喺前日播出嗰集TVB旅遊節目《他們的澳洲駕期》，於車上分享自駕遊經歷，仲爆翠如一段烏龍事，搞到翠如扮嬲話「我下次封住你把嘴」。咁佢哋兩公婆相處恩愛，同樣好錫阿仔蕭哈哈，阿蕭除咗早前出埠買一大堆手信，今日更為寶貝仔慶祝一歲生日！
阿蕭喺節目透露當年二人瞞住屋企人，揸車去Tauranga辦理註冊，完成手續後要等候7日先能夠領取結婚證書，到咗領證當日，翠如見現場唔少身形健碩兼有紋身嘅女士，疑惑點解今日咁多人結婚，阿蕭叫佢唔好理人，照去交表格，直至遞交表格嗰刻，翠如先驚覺自己排錯隊，嗰條隊係坐牢、交罰款或辦理死亡證，原來隔籬間房先係領取結婚證書嘅地方，阿蕭笑指跟翠如一齊有好多滑稽嘢，之不過呢啲都係難忘嘅點滴。
翠如今日喺社交平台分享影片，原來佢同阿蕭為1歲寶貝仔哈哈慶祝生日，舉行一個小型生日會，翠如開心寫道：「蕭哈哈，這一天，是你睡醒的第365個早上，您還在感冒中。爸媽不為意眨了眨眼，您一歲了。爸爸媽媽笨拙地做了一個最細小的生日會，紀錄您，幸福的一刻。祝我們的小笑瞼生日快樂🎈🌈。」
翠如解釋除咗自己未被傳染，全家病晒，所以低調喺家裡慶祝，片中見阿蕭兩公婆努力佈置，預備咗氣球及彩虹蛋糕，哈哈見到蛋糕及色彩繽紛嘅氣球，立即笑晒興奮爬上前，隨後一家三口唱生日歌兼吹蠟燭，而一班圈中好友陳自瑤、區永權、梁諾妍及連詩雅等紛紛向哈哈送上生日祝福。
