郭晉安養狗為送女兒生日驚喜 黃智賢一屋三狗添夫妻生活情趣

郭晉安 同 黃智賢 帶埋愛犬現身電台接受訪問，安仔抱住三歲大嘅愛犬Hunter流露出慈父表情，原來當初養Hunter嘅原因，都係源自於安仔一夥慈父嘅心，因為安仔知道囡囡鍾意Hunter，於是佢秘密領養，到生日時送畀囡囡做驚喜禮物。

不過一如佢所料，Hunter嘅日常都係由佢照顧，再次養狗，安仔話最挑戰係當Hunter病咗時候要照顧，亦要有心理準備他日佢嘅離開。安仔以往拍劇，甚至打理生意都日理萬機，而Hunter就係佢生活中嘅減壓良方，安仔話放工後返到屋企就會照顧Hunter，過程中就會放底工作上嘅壓力。

阿Ben同太太養咗三隻狗女，而手抱嘅就係7歲大嘅二女Cup Cake，阿Ben話當初睇中Cup Cake活潑性格，因為佢同太太比較靜，希望屋企有位好動小朋友周圍走，添加生活氣氛。不過Cup Cake原來係小霸王，平時喺屋企好嘈。講到三隻寶貝狗女，阿Ben話每次返到屋企都要先摸晒佢哋，再錫晒佢哋，過程中就令到佢感覺到自己好重要，而呢份感覺就非常良好咁話。