Honey Punch 全新主打歌《樓上的姐姐》推出， MV仲邀請咗近期人氣急升嘅「葵芳」蔡蕙琪特別演出，化身為神秘嘅鄰家姐姐。新歌由 伍樂城 包辦作曲、編曲同監製，黃偉文則寫盡少女遠觀大人情感世界嘅好奇同青澀。 歌詞以「小妹妹」視角出發，探究一人分飾兩角嘅姐姐蔡蕙琪大人世界，阿Kay分別飾演嚎哭失戀姐姐同瀟灑失戀姐姐，非常投入歌曲中嘅角色，演技爆燈。
伍樂城指再同Wyman合作自己期待滿分，又大讚Honey Punch幾位年輕成員出道短短8個月，再拍MV已經有明顯進步，加上Kay精湛演技，強烈對比效果令佢非常滿意。 而身為隊長嘅Casey，對新歌亦有特別感受，佢話 ：「首歌其實好表達到我心裏面嘅感受，又想拍拖但係又驚，到我哋正式聽到首歌嘅時候就好似有一個答覆咁！另外最驚喜係Wyman哥哥同Kay姐姐都有share我地既MV，真係好似發夢咁。」
其他成員就話今次好開心同Kay有合作演出機會，而且更一齊拍跳舞Reels。佢哋話拍慢歌MV感覺好似拍戲一樣。而每個人嘅個人鏡頭都靚爆鏡，加上見到Kay演戲大開眼界。
