柯煒林 自去年確診患肺腺癌第四期後，其身體狀況一直備受外界關注，柯煒林呢日接受TVB娛樂新聞台《StarTalk》訪問，剖析患病心路歷程，由起初心情難以接受，到採用標靶治療方案抑制，學習與疾病共存，坦言而家冇事，但佢唔知往後呢隻藥仲可唔可以咁樣食落去。
柯煒林話呢一年好赤裸面對自己，突然好似回顧咗過去33年嘅一生，直到最近呢兩個月先講到自己心情出嚟，柯煒林曾跟媽媽講過感覺似鬼門關走咗一轉咁，始終要接受呢個病喺身體裡面並唔係一件容易嘅事，柯煒林亦唔甘心被疾病打敗。
記得去年出席《觸電》宣傳活動造勢，柯煒林當時仍接受標靶治療，感覺到啲藥有效，身體素質好咗，柯煒林決定積極投入工作，當刻係未完全接受自己個病，坦言而家見到「癌」字都仲會感到害怕。
柯煒林覺得佢嘅呢個年紀要點樣去面對同接受，個病留下嘅創傷好大，唔可能一開始就維持正能量去擁抱疾病，柯煒林笑指自己係屋企成員當中最軟弱嗰個，喺佢患病後，一家人用咗兩星期便整合搬埋一齊住，仲笑言阿媽心態更勝自己，有時仲會講「地獄笑話」。
柯煒林坦然去接受情緒偶爾有崩潰時刻，話冇可能發晦氣掉咗啲藥唔食，因為啲藥好貴，只能夠喺每次崩潰後要識得整理情緒，不斷去拼湊破碎嘅自我，喺抗癌路上繼續努力前行！
