近日先於電台頒獎禮中斬獲四大獎項嘅 MC張天賦 ，宣佈7月將重返紅館舉行全新個唱，更以愛因斯坦「質能方程式」E=mc² 為題，寓意著音樂事業進入新里程碑。
「質能等價公式」自1905年提出之後，揭示質量與能量本質上係同一樣物件嘅唔同形式，MC將呢份科學深邃，巧妙融入到創作中，將自我蛻變與內外統一，轉化為舞台上充滿爆發力嘅表演能量。
佢仲透露今次將係「MC」同「Emz」雙重人格舞台演繹，呢個概念正好完美呼應愛因斯坦方程式嘅奧義，不論係「MC」定係「Emz」兩個身份本質都係張天賦，MC與Emz之間相互轉換、往返流轉，卻始終保持初心。
演唱會海報以一部火紅古董車作背景，MC指鮮紅車身象徵佢喺舞台上發熱發亮嘅魅力；而暗調嘅車尾同空間，就隱喻佢內心深處不輕易示人嘅感性同孤獨。首次接觸古董車嘅MC，拍攝時自覺未能駕馭，不過一知道車輛係自動波後就笑稱，「咁比我揸返去玩多兩日先還。哈哈。」
拍照時佢更被要求瞓入車尾箱又爬上車頭：「全架車比我試晒啦，平日人哋唔試啲位我都試埋。我驚啲衫鈕刮花人哋部車，到時真係要『強行買走』帶返屋企慢慢玩，哈哈！ 」 上次紅館演出之後，MC指深深明白需要極佳體能去做好一個騷，所以佢早於三個月前已啟動密集體能訓練計劃，積極進行健身同體能鍛鍊，希望以最好面貌回饋歌迷。佢仲笑言：「最大嘅敵人係肚腩，而家同肚腩係『敵對狀態』，希望到7月我哋可以達成和解，由『一嚿腹肌』進化成『一排腹肌』。要乖乖地忍口囉，控制下飲食。」
而舞台呈現方面，MC透露將有非常豐富嘅環節，以及必不可少嘅舞蹈表演：「其實已經開始咗排舞啦，到時入場大家就知。」 鑑於上次門票一開即「秒爆」嘅火爆程度，MC估計今次亦會一票難求，門票11號起供優先訂購，佢話：「場數都一定會開多過上一次嘅，具體等官方進一步公佈啦。我負責唱歌同表演，其他交俾公司。」
