香港樂壇搖籃「華星唱片」成立55周年，推出「星塵55」大型音樂企劃，將經典作品復刻推出黑膠唱片，令樂迷重新認識「華星」重要音樂歷史同文化遺產。專訪頭炮由當年以16歲之齡參加「第七屆新秀歌唱大賽」贏得銅獎嘅 鄭秀文 揭開序幕。
7月Sammi就會喺啟德主場館舉行三場亞洲巡迴演唱會終點站，而「華星」亦於呢個時刻推出「Sammi 初」黑膠唱片，當中《不來的季節》同《Chotto等等》都包括其中，經Remastered提升音質。 Sammi指呢次重新推出嘅黑膠唱片非常有意義：「參加『新秀』係我人生好重要嘅一步，好細個嘅時候，大約10歲、11歲左右，我已經決定當夠16歲就要去參加新秀，其實我好細個內心已有呢個plan。踏出呢個里程碑，參加呢個比賽入咗行，係我音樂旅程一個非常重要嘅起點。」
年紀輕輕嘅Sammi當時表現淡定：「我而家睇返都覺得自己當時幾淡定，屋企人俾我好大嘅支持度，爸爸嘅參與度好高，佢幫我揀歌，俾好大嘅自由度，喺我背後支持我。」賽後Sammi一口答應與「華星」簽定8年合約：「當時我計數，8年後都係廿幾歲啫！有啲同學為咗未來諗緊點算嘅時候，但我冇壓力，考完會考即刻有份工，前面有條路等我去行，而且係我自己去揀。」
今次嘅黑膠碟收錄Sammi人生第一首派台歌《思念》、第一次三台冠軍《不來的季節》，仲有經典作品《娃娃看天下》。佢話：「《娃娃看天下》當時唔係大Hit作品，但對我嚟講係一個timeless作品。我以前唱呢首歌真係『娃娃』，依家用大人嘅視覺去睇呢個世界嘅成功、失望、挫折。」入行後工作不斷亦極多元化發展嘅佢又話：「有時諗到啲點子或者接到一啲好有趣嘅job，我就會好興奮。源於呢個Passion，嚟到而家呢個年紀仲可以繼續run。」
Sammi又坦言曾幻想退休：「如果天父要我停就停、做就做。我自己內心知道，好多嘢令我會澎湃，尤其是舞台上嘅創作，一諗到啲好玩嘅嘢就會好興奮。喺演唱會上，我會傾向藝術成份較高，例如《裸體早餐》嘗試結合藝術元素放喺演唱會。又例如去年『拉闊音樂』《浮雕》嗰part藝術成份好高，我覺得啲觀眾好接受。我好鍾意呢啲嘢，好想介紹畀觀眾，嚟緊傾向藝術性高啲嘅表演方式。」