文創產業發展處與香港電影發展局率領業界香港代表團前往法國康城影展，陳家樂獲邀以香港演員身份參與，推廣香港電影。家樂首次踏足康城，全程表現興奮，更同韓國女神全智賢有近距離接觸，認真恨死隔籬。
踏足國際影展，家樂指完全冇壓力：「今次所有事情都非常新鮮，我感覺非常榮幸及興奮，耳目一新。」家樂此行係享受多過緊張，坦言事前有做定功課：「去之前有留意有邊一個國家嘅影星或者電影會喺康城出現，希望可以寓工作於娛樂。」可惜時間唔夠用，家樂只能夠睇到全智賢嘅新戲。
家樂形容康城影展環境非常chill，令人容易投入。提到整個旅程最難忘嘅時刻，家樂立即眉飛色舞：「最難忘一定係喺Korean Night派對上認識全智賢，我哋仲有簡短對話及握手，公司同事非常妒忌。」至於出席全智賢新片《屍殺禁區》康城首映禮行紅地氈，家樂依然回味：「有機會可以參加呢套電影嘅紅地氈及全球首映，當然非常興奮。」首映禮現場，家樂跟女神有互動，四目交投嘅一刻，女神非常友善向佢點頭微笑，令家樂興奮到瞓唔着。
呢次係家樂第一次去康城，佢特別感謝香港文創處安排：「行程由落機一刻至回港前一晚排到滿晒，非常充實。」離開康城前，團隊終於有幾個鐘空檔，大家開心聚埋一齊食海鮮餐，又去古城影靚相，家樂笑稱：「離開前最後一刻再食多一杯雪糕，為今次旅程畫上圓滿。」
