馬貫東近日無辜捲入李家爭產風波之中，傳出其母係李家鼎前女友，事件冇影響到馬貫東嘅日常，見佢如常投入工作同佢最愛嘅興趣，最近仲幫好友張振朗帶嚟嘅愛寵美容扮靚。
張振朗近日開始投入拍攝新劇，趁住仲未太忙碌就帶咗一對狗狗去搵圈中嘅寵物美容師兼好友馬貫東，幫一對小狗扮靚，感覺煥然一新之後，振朗當然要同馬貫東嚟個合照啦。
呢個Post一出咗最搞笑嘅係振朗同一班好友嘅對話，賴慰玲隨即問振朗點解唔剪埋，振朗幽默話今日只係自己去剪髮，唔係兩隻愛犬剪，Winki繼續玩嘢問咁佢帶兩隻狗去做咩，振朗再玩大啲話「係喎，應該帶你兩個仔嚟」，單憑佢哋嘅對話，可以感受到兩位好朋友平日嘅相處有幾玩得。
振朗同Winki鬥嘴一輪後，就到黃翠如加入話好想帶隻狗去畀馬貫東美容，振朗隨即幫手拉客，仲大讚馬貫東服務好、照顧周到，笑言自己都想俾佢剪。事實上馬貫東除咗演藝工作投入認真之外，自從升呢做寵物美容師後，唔少圈中人成為佢嘅客戶，好似佘詩曼、江美儀、陳瀅、陳煒、郭晉安等有搵佢幫寵物扮靚，為其打響招牌。
有眼明嘅人反問振朗幾時養咗隻狗，翻查振朗嘅社交平台又真係唔見佢同呢對小狗互動嘅蹤影，不過振朗貫徹幽默作風話上天安排俾佢。
