修哥 胡楓 以94歲高齡再次刷新自己創造嘅世界紀錄，星期日下午於紅館舉行《修哥九五至尊無限楓騷演唱會》，今次佢仲特別安排，希望入場嘅老友記睇完騷可以返屋企食晚飯，所以改為下午開騷。
早前有指今次修哥演出，黃牛票價竟炒高3倍，中午修哥出席拜神儀式時，就笑指早知自己收起一疊飛慢慢賣，貫徹佢嘅幽默作風呀。下午開場前多位好友已經先後現身紅館，現場亦有大批花籃祝賀修哥再次開騷。
除咗多位相識多年嘅好友之外，唔少老友同政經界人士都有捧場，好似陳法蓉同爸爸、保安局局長鄧炳強夫婦、TVB行政主席許濤夫人陳祉妤、高永文醫生夫婦、李丞責夫婦、顏米羔同媽媽等都係座上客。
舞台兩側設有10圍酒席，多位好友都先後到台上同修哥合唱，好似 陳松伶 周柏豪 陳百祥 肥媽 「中聲家族」嘅 張與辰 劉洋 黃博 同「聲秀三甲」馮熙燮 柯雨霏 同 胡子貝，仲有 BIG FOUR 楊千嬅 汪明荃、羅家良、薛家燕，仲有早前先完成出道40周年演唱會嘅 草蜢 莫文蔚 陳奕迅 先後上陣，Eason更指自己登場修哥毫不知情。 
而兩大契仔 張家輝 同 張學友就於演唱會末段現身，兩人一個就叫修哥公開同羅蘭姐如幻似真嘅「情史」，一個就同契爺鬥舞，非常百厭，亦令台下笑聲四起。
健力士世界紀錄人員，於現場宣佈修哥以「舉辦演唱會最年長的華語藝人」挑戰，以94歲又140日挑戰成功，嬴得全場觀眾掌聲，而 劉德華 此時亦一身招牌牛仔樓打扮上台，與全場一齊為修哥歡呼，最後完美完成呢次長達4個半小時嘅破紀錄演出。
