資深演員 陳敏兒 於6月12日因病離世，終年66歲，佢嘅兒子 廖文哲 及 廖文信 透過社交平台公布噩耗，並透露安息禮會遵照媽媽生前意願，以私人形式低調舉行，僅限親友同家屬參與。據知敏兒喺呢個星期嘅身體情況唔樂觀，所以佢嘅朋友亦相繼到醫院探望，為佢打氣。
敏兒喺去年十月、65歲正日生日當天，喺社交平台上載咗一張坐喺窗前望風景嘅照片，透露自己身體出現嚴重狀況，並已喺6月進行緊急大手術，不過，敏兒當時並未有交代病因，只係話自己係一個慢性病患者。
而敏兒喺2025年接受我哋《TVB娛樂新聞台》訪問時，對於自己嘅病情表現得好正面，當時佢表示自己度過咗最驚險同艱難嘅時間，身體康復中。
藉生日，敏兒亦宣布啟動網上頻道《好好生活》，佢首支影片，就透露自己於2024年10月舉行咗「生前告別會」，以積極態度面對人生無常，同時好珍惜呢次機會，好好去答謝每一位，因為佢知道好好道別係非常重要，減少分離嘅遺憾，佢形容當晚係充滿愛同正能量，而喺片中敏兒亦透露近兩年身體狀況越來越唔理想。
我哋亦聯絡到敏兒生前好友 賈思樂 ，Louis得悉噩耗後心情非常悲痛，無法回應，但願敏兒能夠喺天堂，同丈夫及兒子團聚，獲得安寧同幸福，並會深深懷念佢。
敏兒1979年入讀第八期TVB藝員訓練班，當年憑住清麗脫俗口嘅氣質同正面嘅形象，火速上位成為當家花旦，更以第一女主角嘅身份參演多部劇集，而佢最後一部參演嘅影視作品，就係1992年播出嘅劇集《愛生事家庭》。除咗拍劇之外，敏兒更憑住淡定同極佳嘅口才，擔任過唔少節目嘅主持，絕對係一位全能嘅女藝人。
1987年敏兒同喺藝員訓練班嘅同學 廖啟智 結婚，結束8年愛情長跑，婚後敏兒誕下三子，佢更甘願放低如日中天嘅演藝事業，專心相夫教子，同智叔更係圈中公認嘅模範夫妻。
2006年，幼子廖文諾因血癌離世，令敏兒大受打擊，更一度患上嚴重抑鬰，甚至萌生輕生念頭，最後敏兒同智叔一齊跨過難關，重新振作。2021年，敏兒經歷丈夫智叔胃癌病逝，呢次敏兒選擇樂觀面對，更投身生死教育，成為導師，雖然同丈夫天人永隔，但敏兒不時都喺社交平台發文思念亡夫，好似喺2024年敏兒就喺兩人結婚紀念日上載婚照，並解構當年㨂11月11日成婚嘅意義，係取一生一世，一雙一對嘅意義，可見兩人夫妻情深。
