關心妍籌辦跨機構籌款騷 盼望拉攏好友以歌聲送暖

關心妍 黃劍文 陳芷盈 同 龔柯允 為稍後舉行嘅慈善音樂會綵排，呢日Jade嘅囡囡都有現身，仲準備咗雪糕請一班參與綵排嘅朋友仔食。大家又為月底生日嘅Jade送上驚喜，趁佢同囡囡練歌時送上蛋糕慶祝，令Jade驚喜萬分。

Jade生日願望係首個跨慈善機構嘅籌款騷能順利完成，希望更多年青人同小朋友得到溫暖同愛，佢亦表示喺現時大環境下，真係非常需要大家出心出錢去支持呢個騷。

龔柯允覺得佢哋每位都有自己嘅特質去傳遞愛，但可以保證嘅大家都係靚聲之人。Jade都話三位老友各有優點，相信喺台上可以令年青人同小朋友感受到愛的力量。