方力申夢想成真帶愛女上游泳班 Isla游水初體驗由緊張變主動

方力申  同爸爸 方毓仁、細佬 方圓明 作客節目《家傳之「保」2》，將於24號晚 8 點喺翡翠台播出。節目中，小方講過希望將游水嘅熱誠傳承畀囡囡Isla。節目都未播出街，小方呢個願望就實行咗第一步。

小方喺社交平台分享咗Isla第一次上游泳班嘅片段，見到小方抱住囡囡坐喺池邊踢水，片中Isla個樣好似有啲疑惑，小方話：「原來平時好鍾意玩水嘅佢，去到陌生嘅泳池一開始都係緊張，慢慢適應之後就好啲。」的確睇到Isla表情越來越放鬆，仲會同爸爸一齊玩兼且自己踢水，小方都話好期待再同Isla一齊上游泳班。