米雪 6月份先開完入行55週年演唱會，轉頭佢又投入準備10月份嘅歌劇演出喇。米雪演歌劇聽落好似好新鮮，原來今次仲係一個結合粵劇嘅原創歌劇，有機會參與呢個中西合璧嘅演出，米雪都覺得好新鮮：「佢個唱法係Crossover，意大利歌劇結合粵劇，幾特別，幾好玩。」
米雪喺劇中飾演女皇，有時裝亦有古裝，同劇演員個個都唱唔同語言，有意大利文、法文、英文，又有粵語，相信觀眾都會覺得好有新鮮感。
曾經為TVB劇集《靈戲逼人》獻唱劇集歌嘅粵劇花旦 林穎施 ，今次同米雪會有唔少對手戲，原來兩人過往曾合作粵劇演出，呢日喺現場仲見到米雪好細心幫穎施執妝容，穎施透露曾經同米雪一齊去新加坡演出，私底下感情好好，情同姊妹，米雪私底下仲會傳授佢養生秘訣。
本身係歌劇演員嘅男主角顏嘉樂，對於有機會同跨界別嘅對手合作，都覺得好期待。而音樂總監周曉晴就話因為要結合中西方音樂，所以好有難度。
