旅遊達人梁芷珮（Christy）憑主持《潮什麼》系列旅遊節目而成功入屋，經常帶同家人環遊世界拍節目兼自駕遊，新一輯《南美潮什麼2》8月17號起晚上10時30分於翡翠台播出。Christy因今年暑假出發歐遊，未能回港宣傳。
myTV SUPER重溫《南美潮什麼》
身經百戰嘅旅遊達人Christy，竟然坐廉航中伏，被收取附加費用，而呢間廉航以短途機票常以超低優惠作招徠。Christy今次前往意大利旅行，坐歐洲最大嘅廉價航空之一嘅航班出發，Christy勸大家記得歐遊有得揀就唔好坐呢間廉價航空，否則個人會嬲嬲豬。
Christy仲分享自己中伏經過，指自己一個booking，轉機買行李要畀兩次錢，點知到轉第二班機唔畀佢哋上行李，理由係話行李帶closed，要每位畀100歐元（約905港元）先坐到下一班機，結果下一班機delay咗兩個鐘先起飛。
查實有唔少熱愛旅遊嘅網民有喺網上分享過往坐該廉航嘅體驗，指乘客要記得上網Check In，如果唔係，喺機場Check In要多付單程45歐元（約408港元）左右，而有啲櫃檯要睇乘客嘅登機證紙本，機場補印登機證一次要約15歐元（約136港元）等額外附加費用，亦有網民試過無奈被取消機位，要重新買下一班航班嘅機位等不快嘅經歷。
