平時要參觀無綫電視城嘅機會唔算多，電視製作亦係相對神秘嘅一個行業，而呢日一班禁毒領袖學院嘅學員，以及多位少年警訊成員40多人就獲邀請參觀，TVB義工隊帶領大家深入各個部門﹐了解平時電視機中都見唔到嘅幕後實地情況。
大家先到《東張西望》嘅錄影廠，由主持 陳庭欣 親自接待介紹，仲有機會直接同Toby一齊「主持」，Toby就指呢次同大家見面機會難得，仲落力解答大家嘅問題。之後大家轉往配音組，唔止有幾位資歷豐富嘅配音員現身，「蔥頭」 丘梓謙 同 林凱恩 同樣係首次到訪，仲即場試配，同年青朋友一樣眼界大開。
中聲家族 嘅 沈宗賢 同 阮慧珊 ，呢日就為大家獻唱表演，希望大家繼續保持正能量，努力生活。
