玄學節目《玄戰》日前進行面試，吸引眾多民間高手前嚟參加。而喺閉門面試中，參賽者要接受有一定難度嘅課題考驗，三位主持 洪永城 陳懿德 同 甄敏芳 就話，有三位女參賽者不謀而合算出一樣答案，令佢哋都覺得毛管戙。例如要考參賽者睇一張相睇出相中人嘅死亡原因、年份、位置，三位女仔都全部睇中。
講到賽制，Tony介紹呢次分黑、白兩組，黑色代表資歷尚淺嘅師傅，當呢班師傅對戰完，就會同代表白色，資深一啲高人級師傅對賽。
每位參賽者都嚟自唔同派別，當中不乏經驗老手。其中一位參賽者KK師傅孔麒淦擁有28年接觸玄學經驗，前身亦係一位飛機師。KK師傅就分享咗一個為客人破劫解決醫療事故涉及人命嘅深刻故事。
佢就話因為工作而唔喺香港，但千嚀萬囑客人要避過當晚嘅七點五十分，千祈唔好俾人打錯針，而自己當晚一落機就趕到醫院幫對方解劫。點知天意難違，客人最終都係被打錯針，事件仲鬧上新聞。KK師傅自此之後決定，55歲就退休唔再做機師，要去幫人。KK師傅亦算出呢次賽事嘅最後賽果，連第一名嘅特徵同姓氏都已經卜出嚟。
至於陳玉嫺同李卓妍同屬塔羅占卜師，外號「阿雲」嘅李卓妍唔只有6年占卜經驗，佢另一身份就係TVB藝人。阿雲就話自己緊張咗幾日，亦有特別練自己唔擅長嘅嘢，因為知道考題有可能係要估、骰仔、六合彩數字等等。陳玉嫺就話，自己都唔擅長估呢啲，但會試試挑戰自己。叢因琪、郭鎮邦就分享，5位參賽者要一齊推算一個時間時，竟然最後5個人都推出同一年份，只係推敲細節時會有少少唔同。
《玄戰》8月31號起 翡翠台