高海寧主演嘅劇集《夫妻的博弈》早前喺內地平台率先播出，收獲大批觀眾好評，劇集亦喺香港熱播中。作為女主角嘅高Ling收獲高人氣，而佢亦密密接Job，呢排就忙於同內地女星白鹿喺佛山拍攝新劇。
myTV SUPER重溫逆襲老公小三奮戰故事
近日高Ling就同白鹿喺街上拍攝，只見身穿藍色連身裙嘅高Ling挨住車，表情心事重重咁背對白鹿，而白鹿行前對高Ling講：「他只是在利用你。」並游說高Ling同自己聯手，高Ling表情強裝鎮定，按捺崩潰情緒。雖然呢段路透只有短短幾十秒，但唔少人都大讚高Ling演技精湛，連對眼都好識做戲。
高Ling向來寵粉，完成拍攝後，佢向現場粉絲有禮揮手打招呼，守候多時嘅粉絲都話高Ling人靚親切，所有等待都係值得。
其實高Ling同白鹿唔只被路人「野生捕獲」，更吸引好多靠拍攝明星拍劇等，側拍向粉絲轉售嘅「代拍」嚟拍攝劇集路透。有一次有鷹眼視覺嘅白鹿，更發現有「代拍」爬上樹偷影劇組，仲熱情叫高Ling一齊睇，兩位齊齊露出驚訝表情，好奇對方到底係點爬上樹。