「年年25歲」嘅「校長」 譚詠麟 8月23日踏入76歲，下月即將迎接演唱會嘅佢，連日來在緊密運動備戰之餘，亦獲圈內外大批好友先後為佢舉辦飯局歡度生日月。校長喺社交平台分享同唔同好友嘅慶祝片段，不過當中最矚目同星光熠熠嘅，莫過於早前被指因球隊經營理念不同而傳出反目嘅老友「阿叻」陳百祥現身破冰喇。
校長同阿叻分別於網上公開嘅影片可見，有娛樂圈「福祿壽」之稱嘅譚詠麟、陳百祥同曾志偉久違同框合照，阿叻唔止現身祝賀，仲同校長搭晒膊頭肩並肩合唱名曲《朋友》，眾人高聲齊唱、場面溫馨，徹底破除近年不和傳聞，一唱泯恩仇。阿叻亦特意於影片公開多張兩人珍貴合照，大騷數十年深厚情誼。
派對上另一焦點，就落喺「拉姑」狄波拉身上，自前夫 謝賢 早前離世後，拉姑一直保持低調，今次可算係佢自四哥離世後首度公開現身，影片只見拉姑狀態心情不俗，親自到場之餘合照亦帶笑意。
