阿姐汪明荃與黃淑儀（GiGi姐）於1976年拍TVB劇《書劍恩仇錄》時發生武打意外，其後傳出二人不和傳聞，雖然阿姐同GiGi姐多年嚟強調冇真正結怨，今次二人喺張德蘭澳門演唱會慶功宴，見GiGi姐主動搭阿姐膊頭合照，用行動證明二人早已化解心結。
阿姐日前與丈夫羅家英出席張德蘭澳門演唱會慶功宴，阿姐8月28號迎嚟79歲生日，大會準備生日蛋糕為阿姐提前賀壽。阿姐日前喺社交平台曬出合照，見佢企喺GiGi姐身旁。
相中見GiGi姐化上淡妝，右手輕輕搭住阿姐膊頭，二人神采飛揚，笑容自然從容，各自伴侶亦陪伴在側，一齊影大合照，場面熱鬧融洽。
阿姐、GiGi姐、李司棋與趙雅芝被封為70年代TVB四大當家花旦，但阿姐同GiGi姐曾傳出不和，二人罕有同場，1976年拍《書劍恩仇錄》時，使用金屬真劍對戲，劍斷開後飛中黃淑儀眉心縫4針，GiGi姐曾坦言知道係意外並冇怪對方，當年阿姐事後未有半通電話慰問，令GiGi姐有啲微言，阿姐亦曾為當年未及時慰問公開致歉，多年恩怨早已煙消雲散。
