校長譚詠麟喺76歲正日生日為快閃店揭幕，心情大靚嘅校長以一句多謝回應阿仔譚曉風（Howard）有冇返港陪慶祝，同時大方承認阿仔已有女朋友，仲讚個女仔幾好。
呢日有大批歌迷到場支持，更送生日利是畀壽星，校長話今年生日願望係世界和平，呼籲大家注意環保。校長為咗演唱會Keep Fit，積極瘦身減磅，推咗超過三十個聚會，唔敢太放縱，校長笑指得失咗好多朋友，始終都有十、八個呢幾日埋到身，而家距離目標重量只差5磅左右。
校長話之前有段時間跑街，有時遇上大雨、天氣又好熱，校長有中暑嘅感覺，講到早前跑山時險被車撞，校長笑言早已聽到車響咹，有及時讓路，問到嗰度變咗「校長灣」有冇人特意去撞佢，校長幽默問：「撞我係咩意思，係偶遇吓話。哈哈，我仲以為鬆踭撞我添！」
校長話喺跑步徑都同過唔少人影相，計唔到時，成日都要停一停。一向圈中人緣極好嘅校長，話就算加一、兩場都追唔到飛債，不如開目前場數，大家開開心心就算啦。