《中年好聲音4》登峯之戰星期日晚舉行，七強參加者鄭家聲、蔡宓婕、尹景順、吳亦偉、許雲妮、尤淑情同許美琪經過首回合嘅快、慢歌競爭後，最後由評審加上觀眾投票，結果由尹景順、許雲妮同鄭家聲殺入最終回合，三人以必殺歌決戰，最後由尹景順奪冠，而許雲妮同鄭家聲就分獲亞同同季軍。
賽前已被視為大熱嘅尹景順，唱完快歌後已先獲快歌MVP，以及觀眾至愛好聲音兩獎，最後更成為賽事三料冠軍，佢更指今次參與係人生最幸運嘅事，而登峯之戰對手們表現更極佳，感激大家對佢嘅包容同支持。
亞軍由大馬唱將許雲妮奪得，季軍就係由加拿大返港追夢嘅鄭家聲。事後三甲成員分別發表感受，景順補充要多謝Fans支持，而家聲就話本來諗住無緣得獎，所以宣佈三甲名單時自己嚇一跳，至於雲妮亦對自己成為亞軍非常驚喜，更以黐咗線形容自己心情。
嘉賓評審 巫啟賢 一開始就以98分高度讚揚尹景順嘅《百年孤寂》，更形容佢演出無懈可擊，各方面都非常唔錯。佢更預計往後《中年好聲音》如繼續舉辦，將吸引更多大馬同世界各地歌手參加競爭，仲話節目係屬於全華人世界呀。李克勤 身為另一嘉賓評審之餘更即場為大家獻唱，佢就話一直支持《中聲》，而現場直擊更感受到參加者嘅熱血，佢仲話尹景順快、慢歌都駕馭力十足，非常有感染力又自信十足。
呢晚中聲三代冠軍，以及主持 車婉婉 於開場時一齊上台，佢仲爆原來當日同克勤傾談後先有信心成為主持，台上公開多謝克勤後水煲自然又水滾，婉婉仲回憶當日收到邀請後請教克勤夫婦嘅往事。
呢日 許美琪 同 尤淑情 表演慢歌時先後發生失誤情況，睇住佢哋海選至今嘅 肥媽 就直認戥兩人不值，至於戰友 周志康 同 陳旭培 就一樣戥佢哋可惜呀。
雖然台上失準，不過兩人到後台就獲師兄師姐鼓勵打氣，認為兩人已經盡力無愧表現喇。而佢哋本人都話失誤源於自己唔小心呀。
