胡定欣 近日正式推出首支個人單曲《未知也好》，新歌打造出充滿溫暖與療癒感作品，希望鼓勵大家成為大人後，偶爾冒失迷路亦無妨。新歌已於各大音樂平台上架，MV亦已首播。 過往定欣曾演唱多首劇集歌曲，而今次新歌由概念到內容都源自自身經歷同想法，令佢可以由心出發詮釋。作品源於佢過往與fans交流時感受嘅生活點滴，加上近年觀察到身邊唔少人於生活中面對迷惘同未知。
佢以自己參加歌唱比賽入行、隨後於演員路上不斷發掘自我並獲得認同嘅經歷為例，親身證明人生道路往往出乎意料，希望藉由作品給予大眾陪伴同力量。 定欣坦言今年以歌手身份推出歌曲非常開心，同時感恩過去演藝經歷：「我嘅演員腦好套用到喺《未知也好》上面，當初單純鍾意唱歌嘅我，完全估唔到自己會成為演員，仲喺演戲入面發掘到自己、得到大家支持。而家有機會出自己嘅歌，可能先係最好嘅時機。」
為展現歌詞中追尋初心嘅意境，定欣重返位於薄扶林嘅母校拍攝MV：「新歌開頭講讀書時嘅狀態，對我嚟講，唱歌就係我嘅初心，所以諗都唔諗，第一個畫面就係覺得一定要返小學母校去拍。我小學嗰陣已經好鍾意唱歌，有參加合唱團，學校彌撒又有做領唱，最鍾意就係上音樂堂。今次企返喺學校大禮堂嘅舞台去拍，好似返去自己嘅初心去睇返自己。」
除咗感謝學校借出場地拍攝，佢亦感謝校方安排兩位小師妹參與演出，代表佢唔同成長階段嘅寫照。MV又透過其他故事情節傳遞「無論處於任何年紀或階段，都要勇敢邁出一步去追夢」嘅訊息。更邀請咖啡品牌創辦人Max參與演出，定欣指自己被Max由零開始勇於嘗試的精神打動，認為正係新歌希望帶俾大眾嘅鼓舞。