陳熹潼Rachel 憑住《夫妻的博弈》中林舒雅一角演技再被觀眾讚賞，劇中佢演活一個神經質怨婦角色，加上與老公對質時嘅自摑、聽到小三名時嘅怨毒眼神，都令觀眾讚嘆不已，更喺網上分享Rachel各種名場面。
其中一場Rachel醉酒後被老公黃智賢趕落車嘅一場戲，唔少網民都以為佢真係飲到半醉先開拍；而另一場佢同黃智賢喺家中對罵嘅戲份，由佢將酒杯擲向黃智賢，再到瘋狂自摑，每一幀都令網民讚嘆不已。另外劇中Rachel不時會因為聽到小三個名而露出嘅怨毒眼神，唔少網民都話畀Rachel呢個眼神嚇親。
演藝學院畢業嘅Rachel，近年於不少熱播劇集《逆天奇案》、《法言人》、《逆天奇案2》、《法證先鋒6 倖存者的救贖》、《刑偵12》、《新聞女王2》、《正義女神》等演出，如今喺《夫妻的博弈》中嘅亮眼演出，唔少網民都話Rachel值得一個「最佳女配角」獎項。
