張智霖以代言人身份，出席月餅期間限定店開幕禮，再次續約成代言人，今次Chilam加碼參與埋電視廣告劇情構思，為咗答謝fans到場支持，Chilma冒雨將老婆月餅派畀fans享用。
Chilam日前喺廣州開騷，囝囝 魔童張慕童 擔任結他手，以一頭短髮示人嘅魔童，顏值旋即成為網民焦點，作為爸爸嘅Chilma就話自己勸囝囝剪短頭髮好耐，仲話阿仔個短髮look好好睇，又拍如果自己剪短髮，同魔童真係幾似樣。不過講到魔童個樣似太太袁詠儀，Chilam就即時檸檬精上身調頭就走，仲再三強調魔童係似佢。
Chilam指魔童學咗結他6、7年，喺呢方面有一定嘅造詣，但實戰嘅經驗而家有機會就累積下，至於囝囝係咪想入娛樂圈發展？Chilam就話唔知道，不過實戰後囝囝會知自己有咩不足，希望佢會進步，同埋知道有不足時，會去學返佢需要學嘅嘢。
8月27號就係Chilam嘅55歲生日，現在唔少fans都手持生日手幅為偶像送上祝福，講到生日願望，Chilam就表示希望世界和平，佢唔希望再見到戰爭，因為作為父母，唔忍心見到戰亂中小朋友嘅畫面。
有份主演嘅《璀璨之城》進入後期製作階段，佢就指知道新劇大概會喺年底播出，自己因為配音嘅關係都有睇到部份劇集，坦言相當值得期待呀。