「企鵝人」周志康、「獅子王」羅天宇、「貓女郎」劉佩玥、「白羊君」姚兵、「白眉鷹王」莫家淦、「樹熊公子」黃建東以蒙面身份、動物造型參與TVB歌唱真人騷《中年好聲音4》，早前宣布將於9月底喺麥花臣場館舉辦《愛爆動物音樂秀》，優先訂票經已售罄，明日公開發售。
6位蒙面歌手喺《中聲4》表現均令大家眼前一亮，為樂迷帶嚟驚喜，獲得唔少粉絲追捧支持，今次再度發揮自我， 為大家獻上最精彩嘅演出，讓大家更加認識佢哋對音樂嘅堅持及努力。票價分別為$1380 (VIP福利包括可觀看綵排、與6位歌手合照)、$980、$680。
阿康經歷咗整整差唔多一年嘅比賽，途中有唔少fans問佢幾時開show，而家終於開騷，阿康話今次動物歌手陣容，令佢諗起當初大家參加呢個比賽嘅第一日，大家戰戰兢兢好俾心機去練歌，各自為自己嘅舞台努力，今次大家再為屬於大家嘅音樂會共同努力，有另一種意義，佢同其他5位都係好朋友，自己都好期待，希望唱多啲好歌回饋歌迷。
羅天宇話參加比賽過程中，大家冇機會以組合形式去唱歌，佢都好期待一齊大合唱：「如果唔係公司俾咗我哋參加《中聲4》嘅機會，我相信自己都冇機會可以成為呢個音樂會嘅其中一份子，再加上自己喺24強止步，一直都希望可以有更多機會再去唱歌俾大家聽，所以自己好珍惜嚟緊係音樂會所參與嘅每一部分。」
劉佩玥感謝大家一直以嚟對佢嘅支持同鼓勵：「雖然比賽已經結束，但我好熱愛音樂，好鍾意唱歌，所以一直都繼續好努力咁去練歌同練琴，亦有學習音樂創作，當然唔少得一直要keep住身心嘅健康狀態、做運動無得臨急抱佛腳，要好自律同持之以恆，所以依家keep住鍛鍊自己，唔單止為咗上台表演著衫好睇，而係將好嘅狀態一直keep住，咁就做咩都會更得心應手。」
姚兵覺得呢個音樂會好特別，用動物園嘅概念同身份嚟參加，姚兵記得上次喺自己身上有啲熱度出現就係《星夢傳奇》，已經係十幾年前嘅事，當時完咗比賽之後冇特別舉辦音樂會，所以今次有呢個機會真係好開心，好期待同大家喺舞台上見面。
莫家淦自入行以嚟，一直渴望能夠得到更多唱歌機會：「首先衷心多謝《中聲4》，給予我一個專屬歌唱嘅舞台。每個周日都可以企係台上唱歌，同大家分享音樂，已經係好大嘅福氣。令我更驚喜開心嘅後續仲有一場《愛爆動物音樂秀》，呢個寶貴經歷，亦令我距離歌手呢個身份再邁進一大步。雖然我喺《中聲4》止步淘汰，但我從未放下做歌手嘅夢想。追夢之路唔會停低，往後我會繼續堅持，做屬於自己人生嘅主角。」
黃建東由細到大都有彈琴同寫歌，音樂一直都係佢嘅夢想：「諗唔到因為參加《中聲4》有機會參加呢個音樂會，希望到時彈琴唱歌令到觀眾認識一個不一樣嘅黃建東。」現距離開騷只餘下一個多月時間，六位歌手早有其他工作安排，但佢哋異口同聲指寧願犧牲睡眠時間，都要把今次演出做到最好，希望大家能夠為佢哋喺音樂會中所付出嘅每一分力而感動。
