71歲「大姐明」林建明於8月12號突然喺社交平台曬出臥病在床嘅AI生成圖片，宣布因健康抱恙暫停工作，引起圈中好友及大批網民關心，休息咗一段時間，大姐明日前拍片報平安，並寫「感恩得到大家給我的愛！❤️😘 VL 康復了！🎉🎊💐」。
大姐明於8月26日喺社交平台上載影片報平安，片中見大姐明精神奕奕，企咗喺碼頭嘅餐廳位置，面帶笑容表示：「報平安！報平安！8月頭生病，經過成個月治療慢慢康復，而家OK啦，可以出動嘞！好多謝大家一嚟就問候我，同埋掛住我，好多嘅祝福，Thank You.Yeah!」
大姐明先係雙手合十感謝好友及網民連日嘅關心，片尾更雙手舉V，流露「出關」嘅興奮心情。大姐明早前曬出一張身處醫院，鼻插氧氣喉、手背插針、病床旁放滿藥物由AI生成嘅圖片，並寫上「早日康復」，未有透露具體病因，只透露要專心休養，令一眾網民嚇咗一跳，一度傳出大姐明健康亮起紅燈，而家見到大姐明上載嘅近照，唔少網民讚大姐明狀態一流，見到大姐明咁精神就放心晒喇！
