阿Bob林盛斌、張馳豪（Aska）、冼靖峰（Archie）及鍾嘉欣（Linda）一齊現身慈善籃球賽活動，Aska同Archie平日有保持運動，但眼見一班專業球員喺場內熱身，佢哋都話唔敢獻醜，Aska笑言被球員撞一撞都會飛到十丈遠，Archie話好耐未試過全部場中嘅球員都比自己高一個頭。
Archie近日為接拍新劇積極操體能，見到身邊嘅Aska有咁弗嘅體態都好羨慕，原來佢有向Aska取心得，得到嘅秘訣就係刻苦、自律同戒口，而呢啲都係最難做到嘅事。
阿Bob即將舉辦個人talk騷，完成球賽活動，佢就會正式閉關，阿Bob話要養聲、背稿同休息，務求最佳狀態企上台。阿Bob話仔女們都好乖，冇話要扭出街，知道爸爸要專心準備上台開騷。
Linda今次返港忙裡偷閒跟朋友聚舊，同昔日拍檔黃宗澤合體勾起回憶，大家都期待二人重現螢光幕，不過Linda話要視乎劇本同角色，加上而家任何事都要同老公商量，Linda話拍劇機會微啲，因為時間太長，開騷就會易啲，最多只要飛返港幾日就可以。
