劇集《夫妻的博弈》劇情令觀眾睇得肉緊又搞笑，一班演員齊集商場繼續造勢，出演渣男嘅張頴康同林漪娸母子檔合體，即刻令人聯想到佢哋喺劇中衰衰格格嘅畫面。
唔講唔知，原來阿康同漪娸姐事前冇夾過點做，大家喺現場睇住對方嘅表情然後即場發揮，所以佢哋睇到劇集片段時，完全唔記得自己演過啲咁核突嘅表情，漪娸姐仲預告阿康嚟梗仲會出軌。myTV SUPER重溫逆襲老公小三奮戰故事
馬國明喺劇中完美演繹姜幸如專屬守護者，令好多女性都好羨慕身邊有位咁嘅暖男，嚟緊下星期就結局篇，佢哋嘅感情何去何從就仲未知，但兄弟之間就會出現激烈鬥爭，馬明預告兄弟之爭進入白熱化階段，又讚大哥黃智賢好戲，拍爭拗戲份時逼到佢自己都入戲。飾演家族話事人嫲嫲嘅Bonnie姐黃文慧讚兩個孫仔都好戲，而孫女就懵懵地。
馬國明即將喺港姐決賽夜拍住蕭正楠同曹永廉加入司儀團，人生首次接任呢個重要崗位，心情超級緊張。馬明當初收到通知時完全唔敢相信，佢話擔心自己會甩嘴，好彩有兩兄弟一齊做，仲有陸浩明同鄭衍峰一齊，所以都唔擔心。
鄧智堅同董敬文呢對孖寶喺辦公室嘅所作所為，令同事們好反感，佢哋自稱係欺凌聯盟。不過今次董敬文衰得嚟又幾成功獲觀眾讚佢做得好，董敬文覺得係一班女同事演得好，先可以突出佢嘅衰，所以歸功係何沛珈等一班女同事。