今個星期嘅《電影泉攻略》泉叔 王鎮泉 又再為大家帶來電影圈最新消息。四年前DC Studio嘅CEO james Gunn曾經講過話，要喺DC宇宙裡面推出重啟版嘅《蝙蝠俠》電影，當時除咗肯定咗導演同編劇人選之外，其他一切仲未確定，而四年後嘅最近，就傳嚟一個令大家失望嘅消息喇。
有報道指而家成個計劃嘅籌備工作都需要暫停，原因就係因為Paramount Skydance一日未完成收購華納兄弟探索集團嘅工作，一日都未可以繼續，而且據聞收購過程最快都要下年先至完成，兼且唔保證一定能夠收購成功添。呢個時候，我哋不如睇吓今個禮拜新片速遞。
另外，最近名導Ridley Scott喺接受泰晤士報訪問嘅時候，再次發揮佢有嗰句講嗰句嘅性格，毫不留情咁批評而家荷里活電影嘅發展生態，仲話自己從來都唔會重複題材，咁先可以做一個有影響力嘅人物喎。
佢話而家啲電影題材，一係就係講個女仔喺森林俾人殺咗，一係就係講一個超凡FBI特工點樣拯救世界，再唔係就係超級英雄大亂鬥，唔知觀眾們又點睇呢？
本周電影新片速遞
《浪花男女》：Wakesurf 衝浪熱潮下，教練孫漫（楊偲泳 飾）就因為教學方法而被網絡公審，其中一個hater阿川（魏浚笙 飾）對衝浪一竅不通但就盲目跟風，點知發現孫漫原來係被謠傳抹黑，仲令佢身敗名裂。為咗贖罪，阿川以真實身份搵孫漫學習衝浪，兩人逐漸走進對方生命，相知相交。而阿川亦想盡辦法希望平反外界對孫漫的誤解。
《末世行者》：一場致命瘟疫幾乎消滅全人類，文明崩塌，世界步入荒蠻嘅後末日時代。倖存嘅飛行員駕駛員 Hig（雅各艾洛迪 飾）失去摯愛嘅妻子同朋友，帶住愛犬孤獨求生，同時面對兇殘暴戾嘅「收割者」侵襲。一日，Hig嘅小型飛機傳來不明音訊，令佢重燃希望，毅然決定揸住飛機追尋線索，向危機四伏嘅未知飛去。旅程中，佢遇上Cima（瑪嘉烈戈利 飾），令佢重新感受人類之間嘅連繫。
香港票房龍虎榜截至8月26號中午，第1位《蜘蛛俠：英雄重生》、第2位《功夫女足》、第3位《劇場版CHIIKAWA人魚島的秘密》
