陸浩明（6號）與女友陳詩欣（Ayan）愛情長跑14年，多年嚟感情穩定，不時出埠度假大解放，6號早前同女友去馬爾地夫旅行，今日佢喺社交平台貼出一輯海灘浪漫求婚照，二人甜蜜互動滿溢著幸福與恩愛，女友更大方曬出求婚鑽戒。
相中見6號與女友陳詩欣喺北馬累環礁一個度假村，享受浪漫燭光晚餐前，6號喺金黃色嘅夕陽下，喺沙灘向女友求婚，陳詩欣全程含情脈脈望住6號，隔住mon都能夠感受到求婚成功嘅喜悅！
6號開心分享求婚影片並寫道：「Yeah! 我求婚成功 我會用一萬倍嘅努力，讓妳幸福快樂❤️ 求婚時聽到你天使般嘅笑聲令我最甜蜜感動 以後嘅日子，你會成為我最幸福嘅家人 遇上妳係我一生最大嘅禮物 Love You 小公主💕」
準新娘陳詩欣難掩內心嘅激動，雙手遮住嘴巴，眼神裡閃爍出被求婚後嘅驚喜與感動，無名指上嘅鑽戒喺晚霞映襯下，格外耀眼。二人喺鏡頭前，展露燦爛笑容，另一張相見陳詩欣含情脈脈望住未婚夫，6號亦溫柔咁回望，眼神盡是寵溺，夜幕低垂時，二人一邊享受燭光晚餐、一邊深情對話，沉浸喺專屬於佢哋嘅二人世界當中。
6號拍拖以嚟屢次被身邊好友催婚，6號曾多次講過希望喺經濟更穩定，有能力置業「上車」後先考慮結婚，畀女友一個安穩嘅家，而今個月初，6號透露自己要搬屋，原來已築起愛巢。
