岑寧兒（Yoyo）相隔8年再次以詞曲創作，帶嚟全新作品《光透進來的地方》，歌曲由岑寧兒親自包辦詞曲，並與張貝芝聯合監製，以「金繼」為創作靈感起點，寫下一段從裂痕、修復，到重新出發嘅旅程。
「金繼」係一種修復器物嘅方式，破碎之後，不刻意掩蓋裂痕，反而以金色重新連結，讓曾經破裂嘅地方，成為器物最獨特一部分。歌曲冇刻意歌頌傷痛，亦冇把修復寫成一個突然發生嘅奇蹟。岑寧兒用歌作療癒，告訴大家可以帶住尚未完全癒合嘅傷口，好似「金繼」一樣，慢慢重新呼吸，重新踏出一步。
配合歌曲「從裂痕走向光，再向前走」概念，新歌MV遠赴庫布齊沙漠取景。由城市走進沙漠，從有限空間走向無邊無際嘅天地，當一個人經歷過破碎與修復，眼前唔再只係曾失去嘅地方，而係好長嘅路，可以繼續走落去。
歌中反覆唱出「Yes, it hurts, it hurts, it hurts / But I’ll heal, I’ll heal, I’ll heal」，係一種對疼痛嘅承認，亦係一種繼續走落去嘅選擇。「金繼」修復不一定把一切變回原貌，有啲裂痕會留下，有啲缺口亦不必填滿，以流金覆上裂痕，唔再係傷口而成為新形狀。 呢個概念延伸至新專輯嘅整體創作旅程，流金唔只停留於裂痕之上，更化成幾千里金沙，於廣闊無垠嘅天地之中，繼續向前走。
