洪永城（Tony）同老婆梁諾妍（Inez）育有大女Amber及細女Beryl，一對女兒同Tony餅印一樣，超級得意。細女現年已經兩歲幾，媽媽Inez最近喺網上公開一條剪輯片段，分享Beryl出生後幾個月，右眼下方確診患上血管瘤嘅經過及治療。
醫學上血管瘤俗稱士多啤梨痣，最初Inez發現Beryl眼下嘅紅印時，仲以為係刮傷所致，後來部位開始深色決定去求醫，確診患病後就轉介去公立醫院展開一年嘅醫治，女兒年紀少少，喺療程中已接受咗八次激光治療，期間父母Tony和Inez都陪伴在側。
片中見小小嘅Beryl喺床上腳撐撐，經醫護整理，熟睡後先可以進行療程，雖然真正打激光時間不足一分鐘，對於喺門外等候嘅父母嚟講，心情一定既糾結又漫長。
每次完成治療後，Beryl眼下貼上一塊小小紗布，Tony則伏喺床邊凝望住女兒，睇得出佢心痛又擔心，之後媽媽Inez就溫柔地抱住Beryl安慰，幸好一年嘅療程已經順利度過。Inez將過程紀錄同網民分享，感謝醫療團隊貼心幫助，呼籲父母如發現小朋友有呢個情況唔使太擔心，謹記及早求醫。
