三太樊亦敏（Amy）早喺5月28號踏入55歲生日，當時佢同劇組忙於為劇集《愛‧回家之開心速遞》埋尾忙過不停，當時分別獲劇組同劇中嘅兩個阿仔陳浚霆（Andrew）、何晉樂（Rock）等同佢慶祝辛日，令三太忙中不愁寂寞。
原來喺正日生日當天，三太搞咗個大型生日派對，獲圈中眾多好友吳業坤、蔣祖曼、陳煒、黃庭鋒、劉佩玥（Moon）、阮浩棕等出席，三太近日將當日熱鬧嘅場面剪輯咗條短片，以示感謝大家，當中見到有四大視帝陳豪、馬國明、陳展鵬、張振朗都有貼心到賀。
四位視帝祝福三太生日快樂，最緊要係青春常駐同越嚟越瘦同美麗，氹得三太笑逐顏開，馬明笑言早前先睇返Amy嘅檸檬茶廣告。事實上喺片段中，身穿粉紅閃爍貼身裙嘅三太，真係瘦咗好多，身形好fit。
三太上載短片留言話自己慢十拍，終於完成剪接3個月前（5月2 8號）各位送俾佢嘅生日祝福，同大家分享喜悅，亦祝福各位每天都健康快樂。三太完成愛回家之後，早前曾預告會有新任務，而且要積極減磅迎接新角色，現在看來已經成功在望。
