陳山聰近年密密外出登台開騷搵外快，重拾以前做歌手時嘅感覺過足癮。8月30號山聰首踏多倫多開騷同觀眾見面，山聰早已準備咗飲歌報答粉絲，屆時《聲秀》柯雨霏（Ophelia）會擔任嘉賓同台獻唱。
日前山聰已經出發到多倫多做好準備，喺開騷前佢都不忘操體能繼續跑步，順道感受吓當地嘅景色。山聰難得去到多倫多，仲預先約好三哥苗僑偉同三嫂戚美珍一齊跑步，沿途享受湖邊靚景及吸收陽光氣色，山聰仲騷出自己成績，喺一個鐘頭左右完成10KM路程。
現年68歲嘅三哥一向有不老男神之稱，Fit爆嘅身形散發出濃厚男人味，早前佢更Po出一段打拳嘅影片，顯見身上一身結實肌肉，真係指數爆燈。
