羅子溢早前忙住拍TVB新劇《警是個大佬》連踩20個鐘，仍特意向劇組請假半日，出席大女「小珍珠」羅翊心（Hera）嘅幼稚園畢業禮，可見呢位廿四孝爸爸超級愛錫女兒，恰巧楊茜堯最近亦拍畢《模範律師團》，兩公婆終於可以享受溫馨Family Time，分享早前影嘅靚相喇！
子溢同茜堯噚日喺社交平台分享一條影片，見佢哋陪愛女去啟德郵輪碼頭嘅天台花園影畢業照，子溢化身「人肉海盜船」將愛女抱實，再喺空中前後大角度擺動，茜堯與細仔Eden亦陪伴在側，齊齊影合照，影片中更穿插一啲愛女Hera嘅嬰兒照作成長對比，開心見證愛女蛻變。
相中見愛女Hera五官標緻、雙眼精靈，顏值極高，茜堯喺社交平台感性表示：「生日，最動人的禮物，原來係女兒的幼稚園畢業照📸 時光流逝，一面慶祝自己，一面見證小朋友邁向新階段。 回望這一路，見證他們膽怯懵懂，到一步步變得自信開朗，每一個小小的進步，都刻在心裡❤️ 祝我們自己生日快樂，感恩手裡擁有的一切緣分與陪伴。 」
子溢同茜堯盼愛女Hera永遠保留內心嗰份純真、勇敢無懼，自在咁體驗屬於自己人生，好好珍惜每一個當下，知足感恩，而愛女Hera嚟緊9月入讀本港嘅新加坡國際學校正式升讀小一，展開新嘅校園生活。
