Liza姐汪明荃於8月28日踏入79歲生日，向來敬業嘅阿姐喺生日前都馬不停蹄工作，日前先現身古天樂演唱會，之後又過大海為好姊妹張德蘭澳門騷擔任嘉賓，阿姐日前作客電台節目訪問時，更罕有談及對生育嘅睇法。
阿姐日前接受節目訪問時，被問對於冇生小孩有冇畢生遺憾，阿姐坦言冇，並罕有地深情剖白內心世界，重提過去一段人生難忘經歷，「我曾經有次小產咗，之後就冇再有喇」，而整個對答過程中，阿姐秉持住堅定且冷靜嘅一貫作風，睇得出佢對呢件事早已釋懷。
阿姐喺節目中透露現今養育孩子壓力沉重，尤其教育先係重中之重，並坦言自己性格冇耐性，亦唔鍾意教人，認為自己嘅精力有限，好難將教育子女呢件大事做到最理想。
雖然膝無兒女，但阿姐早已覓得幸福婚姻，同老公羅家英結婚17年，一直婚姻美滿，幸福早已超越一切，家英哥除咗愛錫阿姐，幽默性格亦不時氹得阿姐非常開心。啱啱79歲嘅阿姐近日展開連串慶祝活動，早前就同契女沛妍食生日飯，老公羅家英當然陪在身邊啦！
