陸浩明同拍拖14年嘅女友陳詩欣（Ayan）終於踏入人生新階段，8月28號， 6號喺社交平台宣佈喺馬爾代夫向女友求婚成功嘅喜訊。
6號撰文分享喜悅，承諾用一萬倍嘅努力，讓陳詩欣幸福快樂。6號曬出多張同女友嘅甜蜜合照，將大大粒鑽戒展示喺鏡頭前，仲有喺寫上「will you marry me」嘅心形蛋糕前合照，不過最閃嘅當然係6號喺畫有巨型愛心嘅沙灘向女友求婚片段，兩人流露住幸福笑容。
6號透過語音向觀眾分享喜悅，先係多謝大家嘅祝福，原來佢花咗幾個月去籌備求婚之旅，知道Ayan好鍾意浪漫，特意揀選咗馬爾代夫呢個地方，由出發到求婚一刻都超級緊張，本來準備咗好多情深說話想講，但最後求婚一刻一片空白，只記得拎住戒指講「你願唔願意嫁俾我」，之後聽到ok同好，就完成咗過程。6號求婚後都有向肥媽報喜，仲話呢杯新抱茶一定唔少得肥媽。
肥媽得知呢個喜訊當然高興到不得了，但就搞笑表示點解唔早啲求婚，金價現時好貴，但唔緊要，最重要係一對準新人幸福愉快，終於娶到新抱仔。圈中好友汪明荃、區永權、朱千雪、馮盈盈、湯洛雯等都紛紛留言祝賀。
