全新玄學競賽節目《玄戰》將於8月31號起，逢星期一至五夜晚10點半首播，首集嘉賓邀請陳展鵬。煎Pan話自己大開眼界，仲好欣賞各位參賽者，為咗考驗一眾玄學高手，煎Pan有備而來。
煎Pan話準備咗一個從未公開過、只有佢同老婆單文柔（Phoebe）知道嘅問題，睇吓各路師傅推唔推算到出嚟，煎Pan仲話之前睇同類型節目就睇得多，有幸上嚟感受一下，感覺都好神奇。
煎Pan太太單文柔婚後專注湊住女兒小豬比，最近更憑個人實力進軍商界經營自家品牌，煎Pan都好支持老婆闖一番事業，指太太近年都係湊小朋友為主，加上煎Pan完全私有化咗老婆，雖然二人都好開心，但覺得無論結婚與否，Phoebe都應該有自己圈子同朋友，個個都叫佢陳太，其實佢都有自己名字，希望佢今次創立小小品牌可以重拾自己人生夢想。
