鄔友正之前喺節目《魔音女團》擔任校董，呢日就為佢創辦嘅品牌拍攝一共十集，每集兩分鐘嘅微短劇，呢次鄔生仲會處男下海客串演出兼為微短劇獻唱主題曲。
鄔生做生意就話難唔到，呢次要一次過解鎖咁多新體驗，一樣係難唔到鄔生，鄔生仲興奮地表示：「難以置信，我第一次拍TVB呢個劇啦，以前從來冇諗住拍，咁今次會拍嘅原因，因為我係海馬牌創辦人，咁我覺得我有責任同海馬宣傳，所以今次咁好機會畀我宣傳，難得TVB畀我做，所以就好興奮，好想做呢個劇。」至於有大冇擔憂自己做唔嚟？鄔生就話佢做嘢都唔會驚，加上佢話對自己要求好低，做得唔好唔緊要，但千萬唔好浪費機會。
鄔生之前膽粗粗參加《中年好聲音4》，雖然喺海選止步，但係並冇淋熄佢對唱歌嗰團火，呢次佢又捲土重來，接受唱主題曲嘅挑戰，佢話由於練歌時間好急，只有14日時間，加上自己又患上流感，只可以帶病練歌，仲話自己以前冇唱開歌，仲形容自己係「超級魔音」，所以練歌時曾經覺得好挫敗，成日覺得自己唱唔好，後嚟佢諗通咗，同自己講盡力去唱，唱得好就一曲成名，唱得唔好都無所謂。
而呢日拍攝現場，仲見到魔音女團MYNT一班靚女，有佢哋喺度，成個片場都充滿歡笑同活力，而等埋位嗰陣，鄔生仲特登嚟探班同佢哋打氣添。
