戴祖儀日前現身鐘表展活動，本身對鐘表有一定認識嘅Joey，介紹表款時駕輕就熟，原來佢本身有收藏名表習慣，而第一隻名錶仲好有意思，因為係佢鍾意嘅顏色同出產年份撞啱係佢出生年份。
Joey自爆花咗六位數購入心頭好，佢話自己當時年少輕狂，唔識儲蓄，誤打誤撞原來表係會升值，不過佢唔會放售呢隻咁有意義嘅表。Joey雖然開完通宵工先出席活動，依然精神奕奕，佢解釋係因為新劇《驅魔速遞》有好拍檔吳偉豪、周嘉洛同陳曉華，大家幾眼瞓都不停搞笑，佢話最搞笑嘅係周嘉洛，因為佢無時無刻都瞓得着，甚至幕後轉機位時，佢企喺度都瞓得着。
Joey近排工作可謂忙過不停，真係連瞓覺嘅時間都冇，不過佢都好識得獎勵自己，一有時間就嘆美食，佢話自己最大樂趣就係食嘢，問到有冇人陪佢一齊食？佢話自己好忙，都冇時間識人，可能要到明年先有時間同人溝通，呼喚追求者再等吓。
