黃庭鋒呢日着到官仔骨骨拍廣告，見佢精神弈奕，狀態非常好，庭鋒仲意外發現自己左邊面影出嚟嘅效果特別好，佢話之前自己一向都冇留意，為咗以最佳狀態拍攝，庭鋒呢兩個星期都努力操練身形，以備不時之需。
庭鋒除咗注重身形之外，亦好注重皮膚護理，佢話每日卸妝後都會敷面膜，難怪呢日見佢啲膚質滑到反晒光啦！
百足咁多爪嘅庭鋒，除咗拍劇、拍廣告之外，佢間中亦會擔任Fan Meet嘅主持，佢都話幾享受呢類型嘅工作，庭鋒話佢第一次做BLACKPINK成員Lisa Fan Meet主持之後，嗰次帶俾佢好深刻嘅經歷，所以呢次再主持韓國天團BIGBANG前成員T.O.P嘅粉絲見面會，令佢冇咁緊張，加上T.O.P本人及團隊都非常好，大家喺綵排時已經好夾，庭鋒話佢仲私下同T.O.P講，話自己有睇佢演出嘅《魷魚遊戲》添！
