蘇志威呢日出席活動，雖然今年5月正式「登六」，但佢保持人老、心不老嘅態度，樂活人生，最近仲初嘗長者搭車優惠。
蘇志威話有日同朋友聚會後，飲咗酒冇揸車，司機又放假，於是喺馬路上見到架111巴士就跳咗上車，記得一嘟係2.4元，司機同佢對一對望，似乎認得佢係蘇志威，之後就好順利咁到上層最前一格坐低。呢個場景令蘇老闆勾起少年回憶，以前最鍾意坐巴士上層第一格擘大個口食風，覺得好舒暢。
蘇老闆囡囡Yumi近日開設首間實體快閃限定店，成為新一代「蘇老闆」，生意業績幾亮眼。見囡囡事事親力親為，蘇老闆雖然感到欣慰，但睇到囡囡咁攰都好心痛，因為阿女每日喺店舖做到凌晨一點半，第二日大清早又返舖頭。蘇老闆曾經化身最強爸爸，有次本來想去接阿女收工，點知阿女話未得，仲要清潔廚房先走，蘇老闆就落手落腳一齊幫手，雖然整蛋糕就幫唔到手，但作為爸爸認為關懷陪伴就係最好嘅助力。
