羅天宇向來被外界封為「女神收割機」，近年修心養性，情傾「東張女神」陳懿德（德德）。二人曾同遊埃及、日本等地，初期一直對外宣稱係朋友，天宇近期受訪時，大方承認二人關係穩定，8月14日更被網民發現佢哋喺紅館睇完騷，天宇攬實德德離場，可見二人愛得甜蜜！
天宇早前以「獅子王」身份參加TVB歌唱選秀節目《中年好聲音4》。緋聞女友德德喺比賽期間，親自到台下現身打氣，戀情越嚟越高調，多次被影到甜蜜互動，又喺社交平台上隔空放閃，噚日有網民喺社交平台上載影片，見天宇同德德並排步出紅館，表現得相當親密。
片中見天宇搭住德德手臂，二人行走時身體貼近，步伐顯得協調自然，完全沉浸喺彼此世界當中，同行仲有好友黃建東。天宇同德德走到熙來攘往嘅街頭，二人準備行過馬路先刻意分開行，可見二人即使戀情逐漸浮面，私底下仍習慣保持一定程度嘅警覺。
